3 terorista todas sa Lanao encounter!

MANILA, Philippines — Tatlong miyembro ng teroristang grupong Dawlah Islamiya, isa sa kanila ay babae, ang napatay ng mga sundalo at mga pulis nang nauwi sa madugong engkuwentro ang paghahain ng warrant of arrests para sa mga high profile cases na kanilang kinakaharap sa mga korte, sa Lumbayanague, Lanao del Sur nitong Sabado ng madaling araw

Kinumpirma nitong Linggo ni Lt. Gen. Antonio Nafarrete, commander ng Philippine Army, at ni Brig. Gen. Jaysen De Guzman, director ng Police Regional Office-Bangsamoro Autonomous Region ang pagkasawi ng tatlong Dawlah Islamiya members sa insidente na naganap sa Barangay Lamin ng nasabing
bayan.

Ayon sa mga municipal officials at mga traditional Maranao leaders, ang mga napatay ng DI na sina Mohammad Nasif Pangandama, Abdullah Kadil Mituon at ang babaeng si Rahma Mindo Salik, kilala rin sa alyas “Nahara”, ay mga wanted sa iba’t ibang kasong criminal na nakabinbin sa iba’t ibang korte sa Iligan City sa Region 10, Lanao del Sur at Marawi City sa Bangsamoro region.

Tatlo pang umano’y terorista na kinilalang sina Fahad Sarip Maruhom, Norhan Otik Kamid at Asnawi Kadir Abdullah, ang nagtangkang tumakas nang makitang nakahandusay at wala nang buhay ang kanilang mga kasama ngunit nasukol din sila at naaresto ng mga sundalo at pulis na kanilang nakasagupa.

Narekober ng awtoridad sa encounter site ang dalawang M16 A1 rifle, isang M79 grenade launcher, isang pistol, dalawang granada, RPG ammunition at mga bala.

Nakapiit na sa isang police detention facility ang tatlong mga naares­tong Dawlah Islamiya members.