SMB pasok sa semis

MANILA, Philippines — Tinapos ng No. 1 San Miguel ang panaginip ng No. 8 Terrafirma na makapasok sa kauna-unahan nilang semifinals stint.

Sinibak ng Beermen ang Dyip, 110-91, sa kanilang quarterfinals ‘do-or-die’ game papasok sa semifinal round ng Season 48 PBA Philippine Cup kahapon sa Ninoy Aquino Stadium sa Malate, Manila.

Bumangon ang SMB, humawak ng ‘twice-to-beat’ advantage, mula sa naunang 96-106 talo sa Terrafirma para maglaro sa best-of-seven semis series.

Lalabanan ng SMB sa semis ang mananalo sa quarterfinals match ng TNT Tropang Giga at Rain or Shine na naglalaro pa kagabi habang isinusulat ito.

Magtutuos sa isa pang semis showdown ang Barangay Ginebra at Meralco.

Humakot si seven-time PBA MVP June Mar Fajardo ng 25 points at 22 rebounds para pamunuan ang Beermen habang may 19 at tig-18 markers sina Terrence Romeo, CJ Perez at Don Trollano, ayon sa pagkakasunod.

Umiskor si Javi Gomez de Liaño ng 23 points sa panig ng Dyip kasunod ang tig-18 markers nina Juami Tiongson at Stephen Holt.

Kinontrol ng Terrafirma ang first half bago kumawala ang San Miguel simula sa third period sa pagtatala ng 63-48 bentahe sa 6:28 minuto mula sa isang 19-3 atake.

Ang layup ni Jericho Cruz ang naglayo sa Beermen sa 94-76 sa 5:47 minuto ng fourth quarter, habang ang triple ni Trollano ang nagbaon sa Dyip sa 110-89 sa huling segundo.