Barangay chairman nabagsakan ng puno, patay!

COTABATO CITY, Philippines — Kalunus-lunos ang sinapit na kamatayan ng isang barangay chairman matapos na mabagsakan ng punongkahoy habang lulan ng kanyang motorsiklo sa bayan ng Midsalip sa Zamboanga del Sur nitong Biyernes ng umaga. 

 Sa ulat ng Midsalip Municipal Police Station nitong Sabado, mismong sa ulo ni Barangay Ecuan Chairman Jessie Seno Sandima tumama ang punongkahoy, habang nakaangkas sa motorsiklo ng isang ka-barangay na si Engineer Dome Capangpangan.

 Naganap ang aksidente habang binabaybay ng dalawang magkaangkas sa motorsiklo ang highway sa Purok 3, Canipay Norte sa Midsalip.

 Inaalam na ng mga barangay officials sa Canipay Norte kung dapat na managot sa insidente ang may-ari ng lupa kung saan nakatirik ang matagal nang patay na puno na malinaw na pinabayaan na dapat sana ay tuluyan nang iti­numba upang naiwasan sana ang disgrasya.