Binata umuwing lasing, kinatay ni tatay

LEGAZPI CITY, Albay, Philippines — Nasawi habang nilalapatan ng lunas sa pagamutan ang isang 25-anyos na binata nang saksakin ng kanyang mismong tatay makaraang umuwing lasing sa kanilang bahay sa Purok-4, Brgy. Mabini ng lungsod na ito kamakalawa ng gabi.

Isang malalim na saksak sa kanang bahagi ng katawan ang tumapos sa buhay ng biktima na kinilalang si Richard Nuñez Mirandilla, residente ng naturang lugar.

Kasong parricide naman ang kinakaharap ng sumukong tatay na suspek na si Jesus Mirandilla, 63-anyos.

Sa ulat, dakong alas-10:50 ng gabi matapos makipag-inuman ay umuwing lasing ang biktima dahilan para magtalo silang mag-ama.

Sa init ng kanilang bangayan, kumuha ng itak ang ama at sinaksak ang anak na duguang humandusay.

Mabilis na isinugod ang biktima ng mga kaanak sa Daraga Doc­tors Hospital pero ka­launa’y nalagutan ng hininga.