Actress Nathalie Hart, sumasabak sa military training ng Philippine Army
MANILA, Philippines — Patuloy na sumasabak sa 45 araw na Basic Citizen Military Training (BCMT) ng Philippine Army ang actress na si Nathalie Hart upang mapabilang sa mga reservists ng hukbo mula sa iba’t ibang bahagi ng bansa.
Ayon kay Col. Xerxes Trinidad, Chief ng Philippine Army Public Affairs, natapos na ni Hart ang ‘war fighting skills, development drills na pangunahing bahagi ng 45 araw na Basic Citizen Military Training (BCMT) para sa mga nagnanais na maging reservists sa ginaganap na pagsasanay sa Camp Riego de Dios sa Tanza, Cavite.
Una rito, noong Hulyo 6 ay inianunsyo ng Philippine Army Reserve Command na si Hart ay magiging bahagi ng BCMT Sanlahi Class 01-2022 kung saan bahagi ng training exercises ay ang rope course, obstacle course, rappelling tower rapid deployment , 40-second breath-holding drill, 12-feet underwater rifle recovery at rifle marksmanship.
Sinabi ni Trinidad na mahalaga ang papel ng mga Army reservists dahil nagiging katuwang sila ng regular na tropa ng mga sundalo at iba pang 1st responders sa pagsasagawa ng relief and rescue operations sa panahon ng kalamidad tulad ng mga bagyo at lindol.
Tinukoy ng opisyal na kabilang dito ay ang pagsabak ng mga Army reservists noong Enero 2020 sa pagsabog ng Taal volcano sa Batangas, pananalasa ng bagyong Odette noong nakalipas na taon at maging sa matinding hagupit ng bagyong Agaton sa Visayas Region noong Abril 2022.
Sinabi naman ni Army Commanding General Lt. Gen. Romeo Brawner Jr. ang kahalagahan ng pagre-recruit ng mga reservists na epektibong tutulong sa regular na puwersa ng tropa ng Philippine Army.
Sa kasalukuyan, nasa 790,000 ang standby at ready reserves ng Philippine Army na krusyal ang papel sa tagumpay ng implementasyon sa development support at security operations ng AFP partikular na ang Humanitarian Assistance Disaster response (HADR).
- Latest
