Mister inutas sa bugbog, isinako saka tinapon sa dumpsite

SAN FERNANDO, Camarines Sur, Philippines — Patay na at nakasilid sa sako sa isang basurahan nang matagpuan ng ilang residente ang isang 33-anyos na mister na unang naiulat na nawawala sa Brgy.Sta.Cruz, San Fernando, Camarines Sur kamakalawa ng umaga.

Namamaga na ang katawan ng biktima na kinilalang si Lorenzo Valladolid Daria, may-asawa at residente ng naturang barangay, dahil sa pinaniniwalaang ilang araw nang namatay bago natagpuang nakasako sa basurahan.

Sa ulat, dakong alas-7:20 ng umaga, ilang residente ang nakakita sa nakabungkos na malaking sako sa dumpsite ng barangay at nang tingnan laking gulat nila dahil sa nakasilid na duguan at pasa-pasang bangkay ng biktima.

Agad naman itong nakilala ng mga kaanak na sinabing ilang araw na itong nawawala.

Naiulat pa ng mga kaanak sa mga opisyal ng barangay na nawawala noong Mayo 4.

Sa imbestigasyon lumalabas na nakipag-inuman umano ang biktima sa ilang kaibigan at sa hindi malamang dahilan ay pinagtulungang bugbugin ito na kanyang ikinasawi. Isa sa kainuman ang sumuko na at umamin sa pagkakapaslang sa biktima. Patuloy pa sa ginagawang imbestigasyon ang mga pulis at pag-alam kung may iba pang sangkot sa krimen.