Away ng 2 pamilya sumiklab: 2 todas, 1 sugatan
PRIETO DIAZ, Sorsogon, Philippines — Bulagta ang dalawa katao habang isa ang sugatan matapos na magpanagpo ang magkaaway na dalawang pamilya na nagresulta ng madugong pamamaril sa Brgy. Talisayan ng bayang ito kamakalawa ng madaling araw.
Kinilala ang mga nasawi na sina Rhey Wellhim Diaz Obejas, binata, at Henry Detecio, habang inoobserbahan sa pagamutan ang sugatang si Norma Diaz Obejas, 64-anyos; pawang residente ng naturang lugar.
Agad namang naaresto ng mga rumespondeng pulis ang itinuturong suspek sa pamamaril na si Jaymar Bernisca Betito, 29-anyos, binata habang tinutugis ang nakatakas na kapatid nito na si Jayson, 32, may asawa.
Sa ulat, dahil sa matagal nang personal na alitan ng pamilya Obejas at Betito, dakong alas-2:50 ng madaling araw nang magkaroon ng mainit na pagtatalo sa pagitan ng asawa ni Jayson na si Neneth at ng matandang Norma.
Lumabas naman ng bahay si Rhey Wellhim para awatin ang nanay niyang si Norma pero biglang namaril ang magkapatid na Betito.
Nang matapos ang magkakasunod na putok ay nakita ng mga residente na kapwa duguang nakabulagta dahil sa tama ng punglo sa iba’t ibang bahagi ng katawan ang dalawang biktima habang sugatan si Norma.
- Latest
