‘Tulak’ bulagta sa Quezon buy-bust
LUCENA CITY , Philippines — Patay ang pinaghihinalaang tulak ng ipinagbabawal na droga makaraang makipagbarilan sa mga awtoridad sa ikinasang buy-bust operation sa Purok Kanluran, Brgy. Talao-talao, kamakalawa ng gabi.
Kinilala ang napaslang na si Wilson Tan na sinasabing kabilang sa talaan ng mga bagong drug personality sa lungsod.
Ayon sa ulat, alas-10:50 ng gabi nang magsagawa ng operasyon ang mga operatiba ng Provincial at City Drug Enforcement Unit laban sa suspek. Gayunman, nakahalata umano ang suspek na mga pulis ang kanyang katransaksyon nang mabilihan siya ng isang maliit na pakete ng hinihinalang shabu.
Mabilis na kinuha umano ng suspek sa kanyang sling bag ang kalibre 45 at pinaputukan ang mga awtoridad sanhi ng engkuwentro at kanyang ikinasawi.
Nakatakas naman sakay ng isang motorsiklong kulay itim ang isa kasama ng suspek.
Nakuha ng SOCO sa encounter site ang kalibre 45 na may kasamang anim na bala, sling bag, isang P1,000, 9 na P1,000 boodle money at 5-gramo ng shabu na nagkakahalaga ng P34,000.
- Latest