Army sergeant utas sa ambush
MANILA, Philippines – Napatay ang beteranong Army sergeant habang isa naman ang grabeng nasugatan makaraang tambangan ng grupong Lucky 9 ng teroristang Abu Sayyaf sa kahabaan ng highway sa Barangay Anoling, bayan ng Patikul, Sulu kamakalawa. Kinilala ang biktima sa apelyidong S/Sergeant Capistrano habang naisugod naman sa Trauma Hospital sa Kuta Heneral Teodulfo Bautista ang sugatang si Corporal Quijano na mga miyembro ng 1st Scout Ranger Battalion. Sa ulat ni Major Felimon Tan, Army’s regional spokesman na isinumite sa Camp Aguinaldo, magkaangkas sa motorsiklo sina Capistrano at Quijano nang tambangan. Gayon pa man, nagawa pang makaganti ng putok ng dalawang sundalo pero napuruhan sa katawan si Capistrano. Napilitang magsitakas ng grupo ng Sayyaf matapos na matanawan ang paparating na reinforcement troops ng militar.
- Latest