5 pulis nang-hijack ng van

BULACAN, Philippines – Muli na namang nasangkot sa kontrobersiya ang hanay ng kapulisan matapos na ituro ang limang pulis na sinasabing responsable sa panghahaydyak ng van ng kargamento sa Barangay Minuyan, bayan ng Norzagaray, Bulacan kamakalawa ng gabi. Kasalukuyan nang tinutugis ang limang kalalakihan na naka-asul na patrol shirt uniform at itim na jacket na tumakas lulan ng kotse na walang plaka.

Inireklamo ang limang pulis ng driver at pahinante ng van na sina Anthony Acebuche, 21, drayber, ng Brgy. Fatima I; Jayson Mangyari, 25, ng Brgy. Kaypian sa San Jose Del Monte City; at si John Perry Rolan, 25, ng Brgy. Bagong Silang sa Caloocan City.

Sa imbestigasyon ni PO3 Dwight Danao,  hinarang ng limang kalalakihan unipormado ng asul na t-shirts ng pulis na lulan ng kotseng may wang-wang ang delivery van na kargado ng furniture sets pagsapit sa nabanggit na barangay.

Kaagad na pinababa sa van ang mga biktima saka iginapos ang mga kamay at paa bago iniwan sa bakanteng lote  sa Brgy. Carissa I, San Jose Del Monte City.

Tinangay ng limang armadong kalalakihan ang delivery van na may kargamento.