4 inararo ng sasakyan ng pulis, dedo

MANILA, Philippines - Apat-katao ang iniulat na nasawi habang isa naman ang malubhang nasugatan matapos magsalpukan ang dalawang sasakyan sa highway ng Barangay Unidos sa bayan ng Tago, Surigao del Sur noong Biyernes ng hapon.

Kabilang sa mga biktima na idineklarang patay sa Adela Serra Ty Memorial Medical Center sa Tandag City ay sina  Lemar de Rosas, 34, driver ng multicab; James Montero, Gleenah Corvera na pawang mga pasahero ni Rosas at mga residente ng Cagwait, Surigao del Sur.

Namatay din habang ginagamot ang ikaapat na biktimang si Maria Montero habang malubha naman ang anak nitong si Jamie Montero,13.

Lumilitaw sa imbestigasyon na nag-overtake ang pulang Mitsubishi Strada (LMP898) ni P/Senior Insp. Darwin Yu sa humahagibis na sasakyan kung saan bumulaga sa harapan nito ang kasalubong na puting multicab (YDZ 366) ng mga biktima.

Boluntaryo namang sumuko si P/Senior Inspector Yu upang panagutan ang kaso.