Driver, pahinante dedo sa holdap
BATAAN, Philippines – Napaslang ang drayber at pahinante ng delivery van habang malubha naman ang isa pa matapos ratratin ng mga armadong lalaki sa naganap na holdap sa bahagi ng Sitio Tuliran, Barangay Mabatang sa bayan ng Abucay, Bataan kamakalawa ng gabi.
Kinilala ni P/Senior Insp. Pepe Humiwat Alindayo Jr., hepe ng Abucay PNP ang mga napatay na sina Joel Castillo, 30, driver, ng Barangay Bagong Silang; at Virgilio Bayani, 49, pahinante, ng Barangay Ibayo.
Samantala, malubha naman at ginagamot sa James Gordon Hospital, si Rolly Avocado, 22, ng Sto. Monica Subd. sa Barangay Tenejero at pawang mga kawani ng Bliss Merchandizing Balanga Magnolia Chicken.
Lumilitaw na lulan ng delivery van ang mga biktima patungong mga bayan ng Dinalupihan, Orani at Samal para magdeliber ng manok nang harangin at holdapin ng mga armadong lalaki.
Dito na isinagawa ang pamamaslang saka tinangay ang mga pitaka at P150,000 cash na koleksyon ng tatlo.
- Latest
- Trending
