Richard sugatan sa car crash, alalay todas

CAVITE, Philippines – Sugatan ang matinee idol na si Richard Gutierrez habang na­sawi ang isa sa kanyang mga alalay nang mabangga ang kanyang kotse sa Silang, Cavite kahapon ng mada­ling araw.

Ayon kay Silang Police Chief Superintendent Da­nilo Buentipo, lulan si Gu­tierrez, 25, at mga alalay na sina sina Nomar Pardo at George Mascora, sa isang Nissan Skyline GTR sports car at binabagtas ang ka­habaan ng Sta. Rosa-Ta­gaytay road sa Barangay Puting Kahoy nang sumal­pok ang kotse sa isang poste ng kuryente bandang ala-1:20 ng madaling-araw.

Batay sa ulat, namatay habang ginagamot sa Adve­ntist University of the Philippines Hospital si Pardo dahil sa malubhang sugat sa ulo at katawan saman­talang is­inugod na­man sina Gutierrez at Mas­cora sa Ospital ng Tagay­tay para sa minor injuries. Inilipat din ang dalawa sa Asian Hospital sa Munti­n­lupa ilang oras makalipas ma­lapatan ng first aid sa Tagaytay.

Sa pinakahuling ulat, inoperahan ang aktor dahil sa pinsala sa kan­yang mata bagaman kinum­pirmang nasa maayos na kalagayan na ito.

Ayon kay Calabarzon Police director, si Gutierrez ang nagmamaneho sa kotse nang mawalan ito ng kontrol sa isang pakur­badang ba­hagi ng lugar hanggang su­malpok ito sa poste ng kur­yente.

Sa lakas ng pagkaka­sal­pok, naputol ang poste ng kuryente kung saan malalim ang lugar na bi­nagsakan ng sasakyan sa isang bangin na sumalpok pa sa isang puno ng niyog.

Pauwi na ang aktor sa ka­nilang taha­nan galing sa shooting ng ka­niyang pe­likula at naka-convoy pa ang mga kasamang artista nang mang­yari ang sa­kuna.

Dahil sa madilim at ma­kurbada ang lugar, na­walan ng kontrol sa ma­nibela ang aktor nang umiwas sa na­kasalubong na jeep at nabangga.