Hapones natagpuang patay

Isang Hapones ang na­tagpuang patay sa loob ng tinutuluyan nitong apartment sa Consolacion, Cebu ka­makalawa ng tang­hali.

Kinilala ang biktima na si Hiromi Susuki Osato, 59 anyos, nanunuluyan sa Gor­gonio apartment sa natu­rang lugar.

Wala namang nakitang anumang indikasyon ng foul play ang mga Scene of the Crime Operatives ng pulisya sa isinagawang pagsusuri sa apartment ng Hapones.

Ang bangkay ng biktima ay dinala na sa funeral parlor para maisailalim sa awtopsya at ng mabatid ang sanhi ng pagkamatay nito. (Joy Cantos)

Pekeng P1,000 nasamsam

Naga City – Siyam na pirasong pekeng tig-P1,000 ang nasamsam ng mga awtoridad sa dalawang suspek na nagtangkang ipalit ang mga ito sa isang Smart Money Transfer ka­hapon ng umaga sa Ba­rangay San Miguel, Iriga City.

Nakilala ang biktima na si Don Colarina, manager ng Pinet Smart Money Transfer.

Ang dalawang suspek na nasakote ay nakilalang sina Carlito Lamadrid 36, may asawa at residente ng Ba­rangay Mascarena, Alabat, Quezon; at Maria Cecilia Ramos, 32, dalaga, ng Ba­langa, Bataan. (Ed Casulla)

Kagawad grinipuhan

Camarines sur – Isang kagawad na si Jaime Talag­tag, 61, ng Barangay San Roque, Bato ng lalawigang ito ang na­tag­puang tadtad ng tama ng saksak sa kan­yang katawan sa loob ng stock room ng kanyang rice mill kahapon ng umaga.

Napag-alaman na ang biktima ay maagang nagising at nag­tungo sa bodega subalit laking gulat na lamang ng kanyang mga kapamilya nang matagpuan nila ito doon kina­launan na nakahandusay at tadtad ng saksak sa katawan.

Natagpuan sa lugar ang isang kutsilyo na may bakas ng dugo na tinatayang ginamit ng suspek sa pananaksak sa biktima at maiwanan nito nang ito ay tumakas papalayo sa lugar dahil sa pagmamadali. (Ed Casulla)

2 menor-de-edad nasagip sa bar

CABANATUAN CITY – Dalawang menor-de-edad kabilang ang isang pipi’t bingi ang nailigtas ng Nueva Ecija Police sa pagsalakay nito sa may 40 beer house sa Ma­har­lika Highway, Barangay Diversion, San Leonardo, Nueva Ecija noong Huwebes ng gabi.

Ayon kay P/Supt. Peter Guibong, deputy provincial director for operations at leader ng raiding team, ang isa sa dalawang nailigtas na batang babae mula sa bayan ng Laur ay nabalik sa piling ng kanyang ina, matapos na isang linggo na puwersahang pinagtrabaho bilang guest relation officer sa isa sa mga beer house. (Christian Ryan Sta. Ana)

Kapitan itinumba

Pinaslang ng mga nag­papakilalang miyembro ng New People’s Army nitong Sabado ng tanghali si Wi­nifrido Ygot, kapitan ng Barangay Halabang Bay­bay, San Pascual, Mas­bate.

Kagagaling lang ni Ygot sa isang sesyon ng ba­rangay council nang pag­babarilin at mapatay ng mga rebelde. (Joy Cantos)