Laguna shootout: 3 holdaper tumba

CAMP VICENTE LIM, Laguna – Nagwakas ang modus operandi ng tatlong kalalakihan na pinani­niwalaang miyembro ng notorious robbery syndicate makaraang mapatay sa pakikipagbarilan sa mga tauhan ng Criminal Investigation and Detection Group (CIDG) ng Region 4A sa bahagi ng Barangay Bucal, Calamba City, Laguna kahapon ng madaling-araw.

Kinilala ni P/Supt. Mark Edison Belarma, chief ng CIDG Region 4A, ang mga napatay na sina Romeo Valora, 35, ng Barangay Malamig, Biñan, Laguna; George Villamor ng Barangay Bucal, Calamba City; at si Reynaldo Ibarra, 46, ng Barangay Marulas, Valenzuela City at pawang mga miyembro ng “Waray-Waray Gang”.

Base sa ulat, nakatanggap ng tawag sa telepono ang opisina ng CIDG mula sa isang residente ng Laguna Hills Subdivision kaugnay sa kahina-hinalang sasakyang Munich Taxi Co. (TWG-524) na nakaparada sa madilim na bahagi ng nasabing village bandang alas-12:30 ng madaling-araw.

Nang respondehan ng mga elemento ng CIDG sa pangunguna ni P/Supt. Leo Quevedo, ay bigla silang pinaputukan ng mga nakasakay sa taxi hanggang sa magkapalitan ng putok na nauwi sa pagkamatay sa tatlo.

Patay agad sina Valora at Villamor samantalang namatay naman si Ibarra sa JP Rizal Hospital sa Calamba  City.

Narekober sa tatlo ang isang granada, dalawang baril na cal .38, isang bolt cutter at isang location map ng subdivision na gagamitin ng grupo para sa kanilang akyat-bahay operation. (Arnell Ozaeta, Ed Amoroso at Joy Cantos)