Van vs motorbike: 2 tinedyer todas

CAVITE — Maagang kinalawit ni kamatayan ang dalawang tinedyer na lalaki, habang dalawa pa ang kritikal ang kondisyon makaraang masalpok ang motorsiklo ng mga biktima ng Hyundai van sa pakurbadang lansangang sakop ng Barangay Puting Kahoy sa bayan ng Silang, Cavite kamakalawa ng hapon.

Tumilapon mula sa sinasakyang motorsiklo (UE-4230) ang mga nasawing biktima na sina Mark Benedict Mendoza, 16; at Jhan-Jhan Garcia, 17, kapwa naninirahan sa Mesa Homes sa Barangay Don Jose, Sta. Rosa, Laguna.

Kritikal naman ang kalagayan nina Albert Trinos at Alfie Aquino ng Barangay Malitlit, Sta. Rosa, Laguna, matapos na bumangga ang kanilang motorsiklo sa unahang sasakyan dahil sa pag-iwas sa nasabing sakuna. Naaresto naman ang drayber ng Hyundai van (XEK-134) na si Hirohito Gamo Jr. ng Barangay Pamiga sa bayan ng Agoncillo, Batangas. (Ulat ni Cristina Timbang)