Tulak tiklo sa 1 kilong marijuana

KAMPO HEN. ALEJO SANTOS, Bulacan – Dinakip ng pulisya ang isang 29-anyos na pinaniniwalaang drug trafficker matapos na masabat ang isang kilong pinatuyong dahon ng marijuana habang pababa ng pampasaherong bus sa Sitio Gulod, Barangay Poblacion, Sta. Maria, Bulacan kamakalawa ng hapon.

Ang suspek na may ilang linggong minamatyagan ng mga operatiba ng Sta. Maria PNP ay nakilalang si Orlando Garcia, 29, may asawa ng nabanggit na barangay.

Sa ulat na isinumite ni P/Supt. Melchor Reyes kay Bulacan PNP Director P/Sr. Supt. Edgardo Acuña, nasakote ang suspek bandang alas-2 ng hapon matapos na sitahin ng mga alertong pulis sa checkpoint na may dalang bag na naglalaman ng epektos mula sa isang nagngangalang alyas Ferry ng Quezon City. (Ulat ni Efren Alcantara)