Senglot na pulis binoga ng kabaro, todas

Dahil sa sobrang kalasingan ay nabaril at napatay ang isang pulis ng kanyang kabaro na nagtangkang awatin ng huli ang pagwawala ng biktima sa Rizal, Cagayan, ayon sa ulat kahapon.

Kinilala ang pulis na napatay na si SPO1 Leonardo Asco, samantala, kaagad naman sumuko si SPO1 Fernando Simangan na kapwa nakatalaga sa Rizal Municipal police station kay Cagayan PNP Provincial Director P/Supt. Ricardo Padilla.

Base sa ulat mula sa Camp Crame, bandang alas-10 ng gabi habang nagbabantay si Simangan at dalawa pang pulis sa gate ng kanilang estasyon ay biglang dumating ang biktima na lango sa alak.

Pasigaw na kinalampag ng biktima ang gate ng naturang police station at nagpaputok pa ng baril sa ere habang naglalakad na pasuray-suray.

Napag-alaman pa na napilitang payapain ng suspek ang nagwawalang biktima ngunit tinutukan ito ng baril.

Bago pa maitutok ng biktima ang hawak na baril ay inunahan na ito ni Simangan na paputukan ng hawak na M16 rifle. (Ulat ni Joy Cantos)