Palasyo pabor sa WFH
MANILA, Philippines — Bukas ang Palasyo ng Malakanyang sa suhestyon na work from home (WFH) arrangements habang patuloy ang pagtaas sa presyo ng mga produktong petrolyo.
Subalit ayon kay Palace Press Officer Atty. Claire Castro, ang desisyon ng WFH ay nakasalalay pa rin sa mga pribadong kumpanya.
Naniniwala aniya ang gobyerno na ang WFH arrangements ay makatutulong para maibsan ang fuel consumption at ang pasanin ng mga manggagawa.
“Kung iyan ang magiging panukala ng mga private business companies, makakatulong na malaki yan. Pero syempre hindi naman didiktahan ng pangulo ang mga pribadong kumpanya,” ani Castro.
Giit ni Castro, malaya naman ang mga negosyo na magdesisyon sa work arrangements at ang pinakamainam para sa kanilang operasyon kabilang dito ay ang hybrid o fully remote setups.
“Kung nakikita nila na ito’y makakabuti sa ating bayan, para sa interes ng ating mga kababayan para makatipid rin sa fuel o sa produktong petrolyo, maganda ‘yang suggestion,” pahayag pa ni Castro.
Isinusulong ng ilang labor groups ang flexible work schemes, kabilang dito ang WFH para makatulong sa mga empleyado na mabawasan ang gastos sa transportasyon sa gitna ng patuloy na oil price hike dulot pa rin ng tensyon sa Middle East.
- Latest
