DOJ planong ibalik sa Makati Prosecutor’s Office ang kaso ng 11 sangkot sa Dacera

MANILA, Philippines — Inihayag ni Justice Secretary Menardo Guevarra na plano nilang ilipat sa Makati City Prosecutor’s Office ang pagdinig sa mga kaso na isinampa nila laban sa 11 indibidwal na sangkot sa Christine Dacera case.

“Ang plano ng DOJ diyan, nakausap ko ang Prosecutor General, ay baka ibalik namin o ipasa namin sa City Prosecutor’s Office ng Makati itong kaso na finile sa DOJ proper... para sila na rin ang mag-imbestiga, mag-conduct ng preliminary investigation,” wika ni  Secretary Gueverra.

Kabilang sa mga sinampahan ng reckless imprudence resulting in homicide, obstruction of justice, “administering illegal drugs”, at perjury ay sina Mark Anthony Rosales, Rommel Galido, John Pascual dela Serna III, Darwin Joseph Macalla, Gregorio Angelo Rafael de Guzman, Jezreel Rapinan, Alain Chen, Reymar Englis, Louie Delima, abogado nilang si Atty. Neptali Maroto.

Sinampahan din ng kasong falsification of an official document by a public offcer si medico-legal officer Police Major Michael Nick Sarmiento na siyang nag-utos sa pag-embalsamo sa labi ni Dacera kahit walang paalam sa pamilya ng dalaga.

Nauna nang isinampang kasong rape with homicide sa Makati City Prosecutor’s Office laban sa ilang kaibigan ni Dacera.

Sinabi ni Guevarra na maaaring piliin ng pro­secutor’s office na resolbahin ang mga bagong kaso kasabay ng naunang naisampa.

Susunod na padadalhan ng subpoena ang mga akusado sa mga bagong kaso para magsumite naman sila ng kanilang counter-affidavits at mga ebidensya.