2 utas, 3 sugatan sa highway tragedy

MANILA, Philippines - Dalawa-katao ang sumalubong kay kamatayan habang tatlo naman ang sugatan matapos salpukin ng van ang punungkahoy sa tabi ng highway sa Barangay Pateng, bayan ng Gonzaga, Cagayan kahapon.

Kinilala ni SPO1 Sanny Agustin ang dalawa na sina Hazel Joy Paconse, 25; at Eddie Danao, 53, mga nakatira sa bayan ng Sta. Ana, Cagayan.?

Sugatang isinugod sa pagamutan ang driver na si Daniel Fadionar, 55, at mga pasaherong sina Rodrigo Benigno, 28; at Renzon Reyes, 15.?

Lumalabas sa imbestigasyon na nawalan ng kontrol si Fadionar sa minamanehong sasakyan matapos maputol ang ball joint ng manibela nito.

Gayon pa man, naggiwang-giwang ang sasakyan sa madulas na highway bago sumalpok sa punungkahoy.

Sa lakas ng impact ay tumalsik ang van ng may anim na metro mula kung saan agad na namatay ang dalawang pasahero.