Estudyante nalunod sa beach resort
MANILA, Philippines – Malungkot na sasalubungin ng isang pamilya ang Bagong Taon matapos na mauwi sa trahedya ang kanilang pagbabakasyon nang malunod ang isang miyembro ng pamilya sa dagat ng pinuntahan nilang beach resort kamakalawa sa San Fabian, Pangasinan.
Ang nasawing biktima ay kinilalang si Ed Paul Cemitara, 14, estudyante at residente ng Makati City na nagbakasyon lamang sa lugar kaugnay ng pagdiriwang ng Bagong Taon.
Batay sa ulat, bandang alas-3:00 ng hapon nang mawala ang biktima habang lumalangoy kasama ang pamilya nito sa beach resort sa Brgy.Nibaliw West ng nasabing bayan.
Napansin ng kapatid ng biktima na si Mary Lorlaine Cemitara, 34 anyos na nawawala ang kapatid matapos ang ilang oras habang masaya silang naglalangoy sa lugar.
Agad namang humingi ng tulong si Mary Lorlaine sa San Fabian Police na nagsagawa ng search and rescue operations.
Natagpuan naman ang biktima na lumulutang sa dagat at dinala sa ospital, subalit idineklarang dead on arrival.
- Latest
