Mister, tumba sa tandem

MANILA, Philippines - Agad na nasawi ang isang mister makaraang pagbabarilin ng dalawang lalaki na riding-in-tandem sa Quezon City, kahapon ng umaga.

Kinilala ni SPO1 Pascual Fabreag, may-hawak ng kaso, ang biktima na si Elmer Agunia, 44, residente ng Area 3, Luzon Avenue, Barangay Old Balara, Quezon City.

Inaalam pa ng awtoridad ang pagkakakilanlan ng dalawang salarin.

Nabatid kay Fabreag na ang insidente ay naganap sa Area 4, Purok 4, Barangay Culiat sa lungsod, ganap na alas-8:00 ng umaga.

Sinasabing naglalakad ang biktima sa lugar ng salubungin siya ng dalawang suspek na sakay ng isang motorsiklo at agad na barilin.