Insan tinodas habang natutulog

MANILA, Philippines - Pinagtripang saksakin ng kanyang pinsan ang isang 25-anyos na lalaki habang natutulog sa loob ng kanilang kuwarto sa Pasig City kamakalawa ng gabi.

Ang biktima na hindi na umabot ng buhay sa Pasig City General Hospital ay nakilalang si John Jonathan Dela Paz, ng 4th St., Acacia, Barangay Pinagbuhatan dahil sa mga saksak sa iba’t ibang bahagi ng katawan.

Ang suspek na isinuko ng kaanak ay nakilalang si Ronald Roxas, 19, factory worker, residente rin ng naturang lugar.

Sa ulat dakong alas-10:00 ng gabi nang pasukin ng suspek ang biktima na natutulog sa kuwarto at walang sabi-sabing inundayan ng mga saksak.

Duguang lumabas ang suspek at tinungo ng mga kaanak ang  kuwarto at nakitang duguan ang biktima kaya’t isinugod sa pagamutan ngunit hindi na ito umabot ng buhay.

Ayon sa kaanak na tila nakadroga ang suspek dahil sa ilang araw na itong hindi natutulog.