Kinidnap na 3 Pinoy nurse sa Libya, nailigtas

MANILA, Philippines - Nailigtas ng mga otoridad ang tatlong Pilipinong nurse na dinukot sa Libya ng hindi pa kilalang grupo.

Sa report kahapon ng Embahada ng Pilipinas sa Tripoli sa Department of Foreign Affairs (DFA) naganap ang pagkidnap sa tatlong overseas Filipino workers (OFWs) na isang babae at dalawang lala­king nurse dakong alas-9:00 ng gabi noong Hulyo 8 sa lungsod ng Sebha sa Libya.

Nasagip ang mga nurses matapos na isa sa kanila ang nakatakas at nakahingi ng tulong sa mga otoridad.

Sa ginawang rescue operations, dakong alas-11:15 ng gabi ay natunton ang kinaroroonan ng dalawang naiwang nurse at nasagip.