Sekyu dedo sa 2 holdaper

MANILA, Philippines - Dedo ang isang security guard, matapos pagbabarilin ng dalawang holdaper na nanloob sa binabantayang convenience store ng biktima sa Quezon City, kahapon ng umaga.

Agad na nasawi si Reynaldo Guiatao, 30, binata ng #12 Orion St., Dela Costa Homes II, Paligsahan sa lungsod dahil sa tinamong tama ng bala sa sikmura at leeg.

Nabatid mula kay PO2 Roldan Cornejo, may-hawak ng kaso, ang insidente ay naganap dakong ala-6:00 ng umaga  sa 7/11 convenience store sa Quezon Avenue, corner Scout Reyes sa lungsod.

Ayon sa report, nagkunwaring costumer ang isa sa dalawang hindi pa kilalang suspek at agad na dumiretso sa cashier na si Nelia Nebrida at nagdeklara ng holdap.

Agad namang sumaklolo ang biktima at aktong binubunot nito ang kanyang service  firearm nang barilin naman siya ng isa pang suspek.

Bago tumakas ang dalawa tangay ang hindi pa batid na dami ng pera ay muli pa nilang binaril ang biktima nang makitang buhay pa ito at kinuha ang kanyang service firearm.