Tropang Giga swak sa 3X3 quarterfinals

MANILA, Philippines — Pinamunuan ng Leg 1 champion na TNT Tropang Giga ang mga umusad sa knockout quarterfinals ng Leg 5 ng PBA 3x3 First Conference Season 2 kahapon sa Robinsons Novaliches.

Pinatumba ng Tropang Giga ang Barangay Ginebra Gin Kings, 21-11, at ang NorthPort Batang Pier, 21-12, para ilista ang 2-0 record sa Pool B.

Nagposte rin ng 2-0 kartada ang Meralco at ang J&T Express papasok sa quarterfinals ngayon.

Kinuryente ng Bolts ang Terrafirma Dyip, 16-12, at ang Pioneer Elastoseal, 21-14, para banderahan ang Pool C.

Pinabagsak naman ng Express ang Platinum Karaoke, 15-10, at ang Purefoods TJ Titans, 21-17, para walisin ang Pool D patungo sa quarterfinals.

Swak din sa quarterfinals ang Ginebra (1-1) sa Pool B, Purefoods (1-1) sa Pool D at ang Pioneer (1-1) sa Pool C.

Apat na koponan ang aabante sa semifinals na magdedetermina sa maglalaban sa finals kung saan nakataya ang premyong P100,000 para sa champion team.

Ang sesegunda ay tatanggap ng P50,000, habang P30,000 ang mapupunta sa tetersera.