Vaccination sa NCAA kailangan

MANILA, Philippines — Maaari na ring maging requirement ang coronavirus disease (COVID-19) vaccination sa pagiging eligible ng mga student-athletes sa National Collegiate Athletic Association (NCAA).

“We’re geared towards including the vaccination in the eligibility requirements of the athletes,” wika kahapon ni NCAA Management Committee member Peter Cayco ng Arellano University sa online edition ng Philippine Sportswriters Association (PSA) Forum.

Idinagdag ni Cayco na kasalukuyan na silang humihingi ng opinyon sa NCAA legal team hinggil sa nasabing plano.

“We recognize the rights of the students to choose kung ma-vaccinate sila or not. We also have to consider the rights of the other students na gusto magpa-vaccinate,” ani Cayco. “So we’re putting it as part of our eligibility requirements.”

Sinabi naman ni Management Committee chairman Fr. Vic Calvo ng host school Colegio de San Juan de Letran na bumili na NCAA ng COVID-19 vaccines para sa kanilang mga coaches, athletes at officials. Ngunit hindi niya binanggit kung kailan ito darating.

Magsasagawa ang collegiate league ng isang information drive para himukin ang mga student-athletes na magpabakuna para makaiwas sa COVID-19.

“Pinu-push namin ‘yung vaccine information campaign,” ani Calvo.

Tanging ang mga miyembro pa lamang ng Philippine national team ang pinayagan ng Inter-Agency Task Force (IATF) na maisama sa priority list para sa vaccination.

Naturukan na ng Sinovac noong Biyernes ang mga miyembro ng Team Philippines na magpapartisipa sa 2021 Olympic Games sa Tokyo, Japan at sa Southeast Asian Games sa Hanoi, Vietnam. Isinama na rin ng IATF sa mga babakunahan ang iba pang national athletes at coaches na hindi lalahok sa nasabing dalawang events.