Pinay shuttlers laglag

MANILA, Philippines — Laglag na sa kontensyon ang Filipina shuttlers matapos yumukod kontra sa paboritong Indonesia sa ikalawang araw ng 2020 Badminton Asia Manila Team Championships kahapon sa Rizal Memorial Coliseum.

Katulad ng sweep defeat nila kontra sa Thailand kamakalawa, nabokya ulit ang Philippine women’s team tungo sa opisyal na pagkakatanggal mula sa Group Y ng prestihiyosong continental tilt na suportado ng Smart Communications Inc., MVP Sports Foundation, Leisure and Resorts World Corporation, Cignal at TV5.

Pinatunayan ni Ruselli Hartawan na siya ang silver medalist ng katatapos lang na 2019 SEA Games nang hampasin si Bianca Carlos, 21-10, 21-18 sa unang singles match.

Yukod din si Nicole Albo kontra kay Gregoria Tunjung (21-19, 11-21, 9-21) gayundin si Sarah Joy Barred kay Putri Kusuma Wardani (19-21, 14-21) sa iba pang laban ng singles category.

Nagdire-diretso na ang kabiguan ng Pinays nang ‘di rin nakaporma ang doubles team nina Joelia Geva De Vera at Chanelle Lunod kina Siti Fadia Silva Ramadhanti  at Ribka Sugiarto (7-21, 8-21).

Panis din sina Alyssa Leonard at Thea Pomar kina Greysia Polii at Apriyani Rahayu.(18-21, 12-21).

Aminado naman si Albo at ang Smash Pilipinas team na kulang pa talaga sila sa karanasan upang makasabay sa Asian powerhouses kaya’ tinuturing na magandang pagkakataon ang torneong ito.

“Sobrang laking advantage nun eh, ‘yung may experience talaga sa paglalaro sa abroad, nakaka-tournament ka, kasi nakakaangat din ‘yun ng morale mo. Kasi kaila-ngan talaga namin ng experience sa game,” aniya.

Sasagupain ng Indonesia ang opening day winner Thailand ngayon para sa liderato ng Group Y papasok sa susunod na round ng Asian championships na qualifiers para sa Thomas and Uber Cups sa Denmark sa Mayo.

Samantala, kasaluku-yan pang nakikipagbakbakan sa Group C ang Phi-lippine men’s team kontra sa Singapore.