Didal gustong baguhin ang pananaw sa skaters

JAKARTA — Sino ang mag-aakala na ang isa sa mga hinuhuli-huli ng mga pulis na mga ba­tang nag-i-skateboard sa kalye sa Cebu ay maka­ka­pagbigay pala ng kara­ngalan para sa bansa sa kanyang pagkapanalo ng gold medal dito sa 18th Asian Games?

Salamat sa mga hu­mu­huli noong mga pulis sa grupo ng 19-gulang na si Margielyn Didal, mas lalo siyang na­ging de­terminado, na­diskubre at ngayon ay isa nang ba­yani ng Pinas ma­tapos makopo ang ika­apat na gold medal ng Pinas sa wo­men’s street skate­boar­ding competition sa Pa­lembang.

Hiling ni Didal na ma­bago ang tingin ng tao sa mga skateboarders at magkaroon ng maraming skateboard parks sa Pilipinas.

“Lagi kaming hinaha­bol ng pulis, bawal kami pumasok sa mall na may dalang skateboard,” kuwento ni Didal, anak ng isang karpintero at tinde­ra ng “kwek-kwek” sa Con­cave Skate Park sa La­hug, Cebu City kung saan siya nadiskubre ni coach Danny Gutierrez pitong taon na ang nakakaraan.

“Malaking karangalan po na mag-iba ang pa­ningin ng tao sa ska­ters. Na­bigyan ng boses ang skateboard. Gusto ko ring maipakita na skateboar­ding is a serious sport but can also be fun as well,” ani Didal, na­katakda sanang umuwi kahapon ngunit mana­na­­tili siya hanggang closing ceremonies bukas dahil siya ang itinalagang flag bearer ng Philippine de­le­gation.