Sagupaang SMB at RoS Fajardo sandata ng Beermen

MANILA, Philippines – Alam ni coach Leo Austria ng nagdedepensang San Miguel na hindi kakayanin ng Rain or Shine na tauhan ng isa si back-to-back PBA Most Valuable Player June Mara Fajardo.

Kaya naman inaasahan niyang pagtutulu-ngan ng mga bataan ni mentor Yeng Guiao ang 6-foot-10 na Cebuano superstar.

“We always have the advantage with June Mar when it’s single coverage.

But I’m sure na they will always help,” wika ni Austria. “We’re anticipating those, but we told the boys that we’re here not just because of June Mar, but because everyone’s contributing and willing to help him.”

Sisimulan ng Beermen at Elasto Painters ang kanilang best-of-seven semifinals series ngayong alas-7 ng gabi sa Game One ng 2015-2016 PBA Philippine Cup sa Mall of Asia Arena sa Pasay City.

Kumpara sa Rain or Shine, matagal na nakapagpahinga ang San Miguel dahil sa nasambot na ikalawang outright semifinals seat matapos maging No. 2 team sa elimination round.

Sa eliminasyon ay may dalawang kabiguan lamang ang Beermen at ang isa rito ay ipinalasap ng Elasto Painters sa bisa ng 98-84 panalo ng huli noong Nobyembre.

“What happened in the eliminations is already a thing of the past,” wika ni Austria. “This is playoff time so it will depend on your preparation and concentration regarding this game.”

Para naman talunin ng Rain or Shine ang San Miguel sa ikalawang sunod na pagkakataon ay dapat nilang gamitin ang ‘running game’.

“Iyon lang ang puhunan namin, our weapon against them,” sabi ni Guiao, muling aasa kina Jeff Chan, Gabe Norwood, Beau Belga, Raymond Almazan at rookie Maverick Ahanmisi.

Maaari ring gawin ni combo guard Paul Lee ang kanyang season debut para sa Elasto Painters matapos magkaroon ng ACL injury.

Maliban naman kay Fajardo, ang iba pang aasahan ng Beermen ay sina one-time MVP Arwind Santos, veteran guard Alex Cabagnot at sina Ryan Araña, Marcio Lassiter at Chris Lutz.

Habang sinusulat ang balitang ito ay naglalaban pa ang Globalport at Alaska sa opening game ng kanilang sariling semis series.