Kesa sa mga rematch kina Marquez at Provodnikov: Tim Bradley mas tututukan ang rematch kay Manny Pacquiao

MANILA, Philippines - Kagaya ni Manny Pac­quiao, iniuugnay din ang mga pangalan nina Juan Manuel Marquez at Rus­lan Provodnikov sa mga posibleng muling ma­­kalaban ni Timothy Brad­­ley, Jr.

Ngunit sinabi ng World Boxing Organization (WBO) welterweight na mas gusto niyang tutukan ang kanilang rematch ni Pacquiao sa Abril 12 sa MGM Grand sa Las Ve­gas, Nevada.

“Well, I’m focused on Manny Pacquiao. That is who I am looking at and he is who I  have coming up but yeah if I look into the future I would fight Mar­quez again,” wika ni Brad­ley sa panayam ng Bo­xingScene.com.

Sina Pacquiao (55-5-2, 38 KOs), Marquez (55-7-1, 40 KOs) at Pro­vod­ni­kov (23-2-0, 16 KOs), ang bagong WBO light welterweight titlist, ay tinalo na ni Bradley no­ong 2012 at 2013.

Ginulat ni Bradley si Pac­quiao via split decision para agawin sa Filipi­no world eight-division cham­pion ang suot nitong WBO welterweight crown noong Hunyo 9, 2012.

Isang unanimous deci­sion win naman ang ki­nuha ni Bradley laban kay Provodnikov sa kanyang unang title defense noong Marso bago tinalo si Marquez via split decision no­ong Oktubre.

“I would fight Ruslan too. I will fight anybody, man. If that fight makes sense then I would do it again,” sabi ng 30-anyos na si Bradley sa 29-anyos na si Provodnikov. “See there are a lot of great figh­ters for me out there.”

Ngunit ang rematch kay Pacquiao ang pinaka­ma­halaga para kay Bradley.

“I have this rematch with Pacquiao coming up and I am concentrating on winning this fight decisively.  When the fight is over  we will see what is out there.”

Naniniwala naman ang 40-anyos na si Mar­quez na kayang resba­kan ng 35-anyos na si Pac­quiao si Bradley sa ka­nilang rematch.

“If judges do what needs to be done, Pacquiao should win,” sabi ni Marquez.  “If Bradley makes the adjustments, it’s going to be a very good fight.”