Ahas sa Garden (167)
WALA rin sa swimming pool si Alexis.
“Wala rin dito ang ahas na si Alexis! Nakapagtataka kung paano siya nakalabas ng bahay gayung may sugat.’’
“Sabi ko nga sa’yo Babe, tinulungan siya ng walanghiyang si Manang. Malaki kasi ang galit sa akin ni Manang. Gusto talaga niyang mapalayas ako rito.’’
“Bakit?’’
“Hindi ko alam. Basta iyon ang gustong mangyari. Noon pa mang una mo akong dalhin dito sa bahay na ito ay naramdaman ko nang mabigat ang loob niya sa akin.’’
Nag-isip si Nath.
“Wala ka bang napapansin kay Manang? Halimbawa ay may kausap siya sa telepono.’’
“Wala naman. Bakit?’’
“Baka kasi kausap niya ang dalawa kong anak sa Australia. Malay mo baka may kaugnayan dun kaya mabigat ang loob sa’yo.’’
“Posible iyon, Babe. Sinulsulan siguro ng mga anak mo ang walanghiyang si Manang para palayasin ako rito. At pati ang ahas na si Alexis, tumulong na rin kaya pinagtangkaan akong gahasain. Napakawalanghiya nila!’’
Naawa si Nath kay Brenda.
“Huwag ka nang umiyak. Magbabayad sa akin ang mga umapi sa’yo!’’
Tumigil sa pag-iyak si Brenda.
“Paano natin hahanapin ang ahas na iyon, Babe?’’ tanong ni Brenda pagkatapos.
“Ako ang bahala! Basta magbabayad siya sa ginawa sa’yo!’’
“Pati ang matandang walanghiya, dapat ding managot sa ginagawang paninira sa pagkatao ko.’’
“Oo, ako ang bahala sa kanila!” (Itutuloy)
- Latest