Congrats, Anne!

CEBU, Philippines — Nikabat na og 18 million ang Instagram followers ni Anne Curtis. Kini maoy gipahibawo niya mismo kagahapon pinaagi sa iyang thank you post. Naglisud siya pagtuo sanglit dili matud pa siya aktibo sa pagpost, dili sama kaniadtong wala pa siyay anak. "Yippeeeeeee! Good morning to 18 million of you! It's kind of insane! I know I’m not as active as I used to be online and I know you all understand why, but thank you for the love nonetheless!"

Dating na

Hingpit na nga giangkon ni Paul Salas ngadto nga “dating” na sila sa kapuso sab nga si Mikee Quintos. Sa balita sa GMA News, niingon si Paul nga nakaamgo lamang sila nga dugay na sab diay sila nga managhigala ug ni-level up na ang ilang kasuod human nila og himo sa The Lost Recipe sa GMA7 sa nilabay nga tuig. Apan wala matud pa sila magdali. Buot ni Paul nga tradisyonal ang iyang pagpangulitawo kang Mikee diin mamisita gyud siya aron mahimamat ang mga ginikanan sa dalaga. Kun mahimo mangharana pa siya. Panghinaot ni Paul nga kun magka sila man gani ni Mikee, mao na gyud unta matud pa kini iyang forever. Twenty-five years old na siya.

Tropa ra

Giklaro ni Joshua Garcia ngadto sa Philippine Entertainment Portal (PEP) nga tropa ra gyud sila ni Trina Guytingco, kinsa bestfriend ni Kathryn Bernardo, nga basketball varsity team member sa Ateneo de Manila University ug sakop sab sa Gilas Pilipinas women’s basketball team nga nakadughit og gold medal niining bag-o lang sa SEA Games sa Vietnam. Nagsugod ang intriga human nikatap ang hulagway nilang duha samtang nanlaag sila sa Palawan, kauban ang ilang mga barkada alang sa birthday celebration nila ni Kathryn, Ria Atayde ug Alora Sasam. Matud ni Joshua, managsama sila nga single ni Trina maong sila maoy gitupo-tupo, pero tropa ra gyud sila.

Kaslon karong tuiga

Engaged na matud pa sila si Wynwyn Marquez ug ang amahan sa partner niini. Kini suma pa sa amahan niya nga si Joey Marquez kinsa nahinabi sa PEP ug sa ubang press people atol sa mediacon sa GMA7 series nga Bolera sa nilabay nga adlaw. Karong tuiga ang kasal. “Ang payo ko sa kanila, hindi madali ang magkaroon ng… pumasok sa ganung bagay. Ang sabi ko lang sa kanila, 'Ang desisyon niyan, nasa inyong dalawa parati.” Dugang sa actor, “Puwede kong maipayo yung pagiging ama sa mga anak. Sa pagiging asawa, wala akong moral ascendancy, e…Sa akin na lang, 'Lahat ng gagawin ninyo, kailangang pag-usapan. Dapat pantay kayo ng desisyon.”

Timeslot na lang

Bag-o og host. Bag-o ang duha ka mga hurado. Kini alang sa bag-ong season sa Idol Philippines sa ABS-CBN. Sa gipadayag sa ABS-CBN pinaagi sa nakalabay nga ASAP Natin To, si Robi Domingo na ang season two host isip hulip kang Billy Crawford nga anaa na sa TV5. Mobalik sila si Regine Velasquez ug Moira isip mga hurado, apan bag-o na ang duha pa ka judges nga ilang makauban. Sila mao si Gary V ug Chito Miranda isip hulip kanila ni James Reid ug Vice Ganda. Ang giatangan karon mao nga kanus-a kini sugdan sa ABS-CBN ug sa co-producer niini nga mao ang Brighlight Productions.

Good Night

"Good night 8 million amazing people." Mao kanang greeting ni Ivana Alawi ngadto sa iyang eight million followers sa Instagram adtong Lunes sa gabii.