Mommy to the beauty queens!

Mao kini ang ikahulagway sa kadaghanan kung Jonas Borces na maoy hisgutan.

Usa siya ka malampusong beauty queen maker nga gihangad ug tinahud sa kadaghanan dili lang dinhi sa Sugbo, kundi lakip na sa kauluhan.

Ang iyang ka maayo mo-makeup  maoy  nakapalawig sa iyang pangalan.

Kasagaran sa mga Cebuana nga manimpad sa mga dagkong kompetisyon sa indigay sa kaulohan moagi gayud ubos sa iyang pagkilatis.

Pipila sa mga nahimo niyang manok mao silang Miss Earth Jamie Herrel, Miss Intercontinental Asia Oceana Kris Janson, Reyna ng Aliwan Steff Aberasturri ug ang bag-ohay lang gikoronahan nga Binibining Pilipinas- Grand International, Eva Patalinghug.

Gani dili  na usab maihap nga mga beauty queen ang nakoronahn tungod sa iyang mga pagiya kanila.

Pagbalik lantaw ni Jonas, high school pa lamang siya sa dihang tuyo na gyud siyang mangita og mga “miss-miss”  o kun beauty pageants sa ilang lugar.

Matud pa niya bisag asang suok iyaha gayud kining sudlan arun makasalmot niini uban ang iyang bitbit nga kandidata.

Lahi nga kalipay matud pa niya ang iyang pagabation sa panahong siya ug ang iyang manok maoy mogawas nga mananaug.

Sa mga nakalabay'ng panahon, ang maong kasinatian mas napalambo pa hangtud gipakatawo na ang pangalang Jonas Borces sa kalibutan sa dagkong beauty pageants.

Gawas sa iyang pagka "mentor to the beauty queens," nabantog usab si Jonas isip usa ka inilang make-up artist sa Sugbo.

Nagsugod ang dedikasyon ni Jonas sa pag- make up sa dihang bata pa siya diin hilig niyang pagwapahan ug artehan ang iyang classmates, silingan ug kaparyentihan.

Sa pagkakaron, dili na maihap nga mga pasidungog ug awards ang naangkon ni Jonas nga miila sa iyang pagka lehitimo isip usa ka make up artist.

Ug kun weddings na maoy hisgotan, ang iyang pangalan gayud maoy numero unong pinangita sa mga nanginahanglan og artistic touch sa pagpaanyag.

Apan labaw pa niining tanan, atong ilailahon up close ang nailang “The Jonas Borces.”