Melissa Mendez nagwild sa eroplano?

CEBU, Philippines - Gikatahong nag-wild ang nakainom nga character actress nga si Melissa Mendez kagahapon sa buntag sulod sa eroplano sa Cebu Pacific kansang destinasyon paingon sa Mindanao.

Gumikan niini, nibalik sa iyang agi ang nahisgutan nga flight aron lamang ikanaog si Mendez sa eroplano gumikan kay naperwisyo na matud pa ang mga pasahero sanglit sulod sa 30 minutos nga negosasyon aron magtarong na ang nahisgutan, wa gayud kini nipatuo ug nangabun-og pa ang mga flight attendant nga nisuway pagpakalma niini.

Ang instagram sa model ug kanhi Mr. World Philippines nga si Andrew Wolf, nagsaysay nga kauban nilang pasahero si Mendez. Suma pa niya, nilingkod si Mendez sa ilang reserved seats, ug nagdumili kini pagbalhin sa iyang lingkuranan, hinungdan nga nagkagubot sila.

Gitabangan matud pa paghangyo sa flight attendant, kapitan sa eroplano ug lakip na ground security si Mendez aron mubalhin ngadto gyud sa iyang lingkuranan ug nilanat pa og 30 minutos usa kini nipatuo.

Nagsigi matud pa og panungo si Mendez sa maong 30 minutos nga gihangyo siya nga mubalhin ngadto sa iyang lingkuranan.

Ang tag-iya matud pa sa maong reserved seat, kauban ni Wolf nga lalake. Dihang nakalupad na sila, padayon gihapon matud pa nga gipanungo ni Mendez ang lalake, hinungdan nga gihatagan kini og duha ka warning cards sa mga attendant.

Unya, gisumbag matud pa ni Mendez ang  lalake nga kauban ni Wolf lakip na ang mga flight attendant.  Dinhi na matud pa nangayo og dispensa ang kapitan sa eroplano ngadto sa ubang mga pasahero gumikan kay kinahanglan gyud nilang mubalik sa ilang agi, aron ipakanaog si Mendez kay nangabun-og na ang ubang pasahero ug ang mga flight attendant.

Asoy pa ni Wolf, 20 ka ground staff sa airline ang nagtinabangay pagpakanaog kang Mendez gikan sa eroplano.

Posibling makamulta matud pa og tunga sa milyon ug mapriso og tulo ka tuig ang matud pa nanimahong beer nga si Mendez, gumikan sa maong perwisyo.

Samtang may usa sab ka pasahero nga ni-post sa iyang Facebook account sa maong hitabo ug susama og mga detalye sa gibutyag ni Wolf.

KC nasakitan og maayo

Nitumaw karon ang taho nga dili na molaag si KC Concepcin gumikan kay magsige kini og hilak. Giingong nagsugod kini human sila nagbuwag ni Paulo Avelino.  Ang iyang mga kritiko nagkanayon nga malason gyud si KC sa gugma.

Batang designers

Ang pagdesinyo og mga sinina maoy gikabisihan sa anak ni Ruffa Guttierez nga sila si Lorin ug Venice. Gitabangan ang duha sa ilang uyoan nga si Rajo Laurel.

Gimingaw

Giangkon ni Jay-R nga gimingaw na siya sa GMA7 nga maoy naghupot sa iyang career sulod sa usa ka dekada.  Malipayon hinuon karon ang singer sa ABS-CBN.

Lumayo Ka Nga sa Akin

Nag-ulohan og  Lumayo Ka Nga sa Akin ang pelikula nga pagabituonan nila ni  Maricel Soriano ug Quezon City Mayor Herbert Bautista ubos sa Viva Films. Malakip usab si Anne Curtis sa maong movie project.

Giuswag ang hearing

Wala makatambong si Sunshine Cruz sa hearing alang sa annulment sa kaminyuon nila ni Cesar Montano sa miaging adlaw didto sa Quezon City Regional Trial Court partikular sa sala ni Judge Angelene Mary Quimpo Sale. Giingong naglain ang lawas ni Sunshine busa giuswag na pud sa laing adlaw ang hearing.

Big project ni Ken

Puwerting lipaya sa Kapuso hunk nga si Ken Alfonso  gumikan kay bisan pa man nga bag-ohay pa siya sa showbiz, nakadawat dayon siya og major project. Siya maoy host sa bag-ong  travel show sa GMA NewsTV nga   Touchdown nga magsugod na karong  March 21.  Suma pa ni Ken nga first time niya nga nakabiyahe sa ubang nasud sa Asia ug Europe.

Album ni Darren naka-gold

Naghudyaka si Darren Espanto gumikan kay nakaangkon na og gold record  ang iyang self-titled album.  Suma pa sa singer nga natuman na gyud ang iyang pangandoy ug nahimong taytayan niini ang pagsalmot niya sa The Voice Kids.

Hinilakay dayon

Gisugdan na sa miaging semana ang taping sa seryeng The Rich Man’s Daughter ug ang emosyonal nga eksena nila ni  Marian Rivera ug  Gloria Romero maoy unang gihimo. Si Gloria maoy mudala nga apohan ni Marian sa nahisgutang serye.

Seguradong mo-click

Masaligon si Xian Lim nga hangpon sa masa ang pelikula nila ni Governor Vilma Santos ug Angel Locsin busa dako ang iyang kalipay nga nalakip siya sa nahisgutang proyekto. Suma pa ni Xian nga dili basta-basta ang maong mga aktres.