Queen of Visayan Songs mipanaw

CEBU, Philippines - Mitaliwan na kagahapon sa udto ang giilang ‘Queen of Visayan Songs’ nga si Susan Fuentes, hataas nga pagka-confine gumikan sa colon cancer.

Sa edad nga 58, mitaliwan ang beteranang mang-aawit  12:30 sa udto didto sa National Kidney and Transplant Institute sa Quezon City. Mga kauban ra niya sa simbahan ang nagbantay niya dihang nabugtuan siya og gininhawa.

Niadtong 2011, sa interview ni Philippine Star assistant entertainment editor Nathalie Tomada nga namantala sa The Freeman, giangkon ni Fuentes ang iyang “self-destructive” lifestyle dihang misikat siya og maayo sa dekada 80. Gibutyag pud niya sa maong interview nga mipailawom siya og kidney transplant niadtong 2010.

Si Fuentes mitekang sa Sugbo niadtong 2011 isip performer atol sa book launch sa “To Never Forget,” ang memoir ni The FREEMAN chairman Jose “Dodong” Gullas. Kauban niya niadto si Ms. Pilita Corales.

Hagbay ra nga gipangita si Fuentes sa magtiayong Dodong ug Nena Gullas, gumikan kay buot unta nila nga malakip siya sa Halad 2010 concert isip pagtamod sa mga Cebuano composers  diin ang sikat nga Visayan singers sama nila ni Pilita, Dulce ug Raki Vega, apan wala siya hipalgi, human sa hataas nga katuigan nga nawala siya sa industriya. Ang iyang presensya sa book launch niadtong 2011 dinhi sa Sugbo ang iyang labing unang paglugwa human sa hataas nga panahon.

Gipanganak nga Susan Toyogan sa Butuan City, Agusan del Norte, giila nga “Queen of Visayan Songs” si Fuentes human mipasikat og daghang awit lakip na ang “Matud Nila”, “Usahay”, “Gimingaw Ako” ug “Miss Kita Kung Christmas” ug adunay pito ka gold-status albums. Adunay duha ka anak si Fuentes, nga nag-edad og 33 ug 32 anyos, nga matud pa sa singer, nga wala na misuporta kaniya sulod sa usa ka dekada.

Sa maong interview, panapos nga pamahayag ni Fuentes ang Biblical verse sa book of Jeremiah,  nga gidungagan niya og: “Si Lord na lang ang bahala nako. ‘For I know the plans I have for you,’ declares the LORD, ‘plans to prosper you and not to harm you, plans to give you hope and a future.”…Marigold Lebumfacil.