Lalaki nag-amok dahil sa 'nawawalang dumbbell;' 2 kamag-anak pinatay

MANILA, Philippines — Patay ang isang mag-ina matapos mabaril ng isang dating criminology instructor na nag-init ang ulo matapos hindi mahanap ang kanyang dumbbell sa Baranggay San Isidro, Talisay City nitong Miyerkules.

Pinangalanan ang suspek bilang si Rogelio Fernandez, 39-anyos, na siyang nagtratrabaho na ngayon bilang isang delivery rider.

Tinukoy ang mga nasawi bilang sina Hilda Fernandez, sister-in-law ni Rogelio, at ang kanyang anak na si Gilbert Fernandez.

Una nang sinabi ni Police Corporal Christopher Lerio, imbestigador sa Talisay City Police Station, na nagwala si Rogelio sa paghahanap ng kanyang weights bago nangyari ang pamamaril.

Matapos nito, pumasok na raw ang suspek sa kanilang bahay at pinaputok ang kanyang .38 revolver. Hindi nakuntento sa nangyari, nagtungo siya diumano sa bahay ng mga in-law at binaril si Hilda sa kanyang dibdib at likuran. Nadamay din dito si Gilbert.

Sinasabing kritikal pa rin ang isa pang biktima na si Irene Fernandez, na noo'y naglalaba. Tinamaan siya sa kanyang likuran.

Nangyari ang pamamaril sa harap ng apat na apo ni Hilda. Nasa limang anyos hanggang pitong anyos ang mga paslit.

Sa paniwala ni Honorato Fernandez, kuya ni Rogelio, maaaring ganoon ang naging asal ng huli matapos ang sunud-sunod na pagkatalo sa sabong.

Sumuko naman agad ang suspek at ngayo'y nasa kulungan na. — James Relativo at may mga ulat mula sa The FREEMAN