2 bulagta sa pamamaril
LEGAZPI CITY, Albay, Philippines – Dalawa-katao ang napatay makaraang pagbabarilin ng hindi kilalang lalaki habang nakikipagsaya sa bisperas ng kasal ng kanilang kaanak sa Sitio Punton, Barangay Tupas sa bayan ng Donsol, Sorsogon kamakalawa ng gabi. Bulagta dahil sa tama ng bala ang mga biktimang sina Jesus S. Lopera, 46, ng Sitio Buang, Brgy. Rawis; at Ronnie Latoga, 38, ng Brgy. Tupas sa bayan ng Donsol, Sorsogon. Sa ulat na isinumite ng pulisya sa Camp General Simeon Ola, nagkakasayahan ang mga biktima at ilang kaanak sa nalalapit na kasalan nang putukan ng hindi kilalang lalaki na nasa madilim na bahagi ng nasabing lugar. Unang tinamaan si Latoga saka tumagos ang bala sa katabi nitong si Lopera na kapwa isinugod sa Donsol District Hospital subalit idineklarang patay. Pinaghahanap ng mga pulis ang suspek kung saan inaalam kung ano ang motibo sa pamamaril.
- Latest