Barangay chairman, nilikida

LEGAZPI CITY, Albay, Philippines – Napatay ang beteranong barangay chairman matapos pagbabarilin ng ‘di-kilalang lalaki habang ito ay pauwi kamakalawa ng hapon sa Barangay Dinapa, bayan ng Castilla, Sorsogon. Napuruhan sa ulo ang biktimang si Chairman Recto Enovejas ng Barangay Macalaya sa nasabing bayan. Base sa police report na nakarating sa Camp Simeon Ola, pauwi na ang biktima mula sa sabungan nang harangin at ratratin ng gunman bandang alas-3:45 ng hapon. Pinaniniwalaang may kinalaman sa pulitika ang naganap na pamamaslang dahil mahigpit na taga-suporta ng mga kandidato sa pagka-alkalde ang biktima.