Jinggoy batok Jonathan

Pareho silang mga magbabalaod. Si Senador Jinggoy Estrada tigpanday og balaod ug tig-imbestigar sa mga hingtungdang resource persons in aid of legislation sa Senado. Si kanhi PDEA agent Jonathan Morales, tig-imbestigar usab sa ilang confidential informants ug tighimog Pre-Operations Report alang sa mga personalidad nga anaa sa listahan, kinsa dakponon tungod sa pag-usar og illegal drugs.

Apan makapakurat. Kay sa 2nd ug 3rd PDEA Leaks Senate hearing, imbes magtinabangay sila aron pagkab-ot sa gipangitang kamatuoran nga maoy gipaabot sa katawhan, kinsa hagbay rang nagduda nga si Presidente Bongbong Marcos (PBBM) adik gayod nga pangulo, gipaulanan man hinuon ni Jinggoy og mga hugaw-hinimohimong akusasiyon ang ligdong nga ahente.

Sa unang hearing, diin si Senador Ronald ‘Bato’ de la Rosa nag-inusara rang mipahigayog imbestigasiyon, siya nakombinse sa mga lehitimong kamatuorang gibukhad ni Sir Jonathan nga ang nahisgotang dokumento mi-exist ug authentic gayod. Ug angay lang subayon kon hain na  paingon ang original copy niini?

Natubag na baya kini ni Sir Jonathan. Matud niya, dihang gitangtang siya sa PDEA, ang naasoyng folder anaa ra sa kustodiya sa PDEA. Sa ato pa, kinsa mang direktora ang milingkod-mipuli sa kinsay giilisan, obligasiyon sa bag-ong director ang pagdawat-pagprotehir niini.

Dapat si PDEA Director General Virgilio Lazo ang pangitaan ni Jinggoy. Ug dili si Sir Jonathan. Gani, usa man kini sa hinungdan nganong andam siya magpaimbestigar sa Senado. Tungod kay siyay naghimo ug nagpirma sa maong dokumento, diin bisan wala na siya sa serbisyo iya kining giampingan nga magpabiling confidential. Hinungdan, nga interesado siyang masubay kinsay naghilabot? Buwahan, mapaylan niyag kaso.

Nindot ang tumong sa ahente. Apan giunsa ba siya pagtratar ni Jinggoy? Imbes ampingan-protektahan-pasalamatan, gipakaulawan hinuon! Giingnang napasakaan kunog daghang kaso ug gihusgahan pang sobra ka bakakon. Busa, dili angay tuohan. Ug dapat hunongon na ang PDEA Leaks hearing!

Dinhi makita ang managlahing panagway ni Jinggoy ug Sir Jonathan: Kinsa kanila ang kanding nga kusog manungay ug kinsa ang puting karnero nga bisag gisugdan na pagdisdis ang panit, wala gyod motiyabaw sa kasakit?

Angay hinumdoman, pag-abot sa pinaleng paghukom sa atong Maghuhukom, ang mga kanding ihulog sa impiyerno samtang ang mga karnero mahipunta sa paraiso. Nasayod kaha si Jinggoy niini?