Pari nabati

Sa padayong pagpanudlo ni Hesus sa mga maayong buhat, Iyang gipahinumdoman ang mga tinun-an: “Ang buot molabaw sa tanan, magpaulipon sa tanan. Pakigsama mo sa Anak sa Tawo nga mianhi dili aron alagaran.

Kondili, aron paghatag sa kinabuhi alang sa kaluwasan sa daghan.” (Mateo 20:27-28).

Ambot, hasta kapila na man unta kining ebanghilyoha isangyaw-wali sa mga pari panahon sa Santos nga Misa, ug nganong nalimtan man ang langitnong pagtulon-an niini niadtong pari sa simbahan sa Amlan, Negros Oriental, kinsa imbes malipay unta nga adunay duruha ka nakasalang binuhat nga magpakasal aron maluwas human nila unaunahag kaon ang gidiling bunga sa paraiso, iyaha man hinuong gikasab-an?

Tungod ba kay na-late sila, 8:45 a.m. nang miabot imbes alas 8 a.m., nga maoy gikatakdang iskedyul sa ilang pagpakasal? Hinungdang nasuko ang pari, nga wala man lang misulay pagsubay nganong nadelatar ang pag-abot sa kaslonon?

Kay kon gibuhat pa kini sa pari, masayran unta niya, nga usa sa mga ninang sa kaslonon, kinsa mangangalagad sab sa maong simbahan, bisperas sa maong kasal, sa may ika-alas 11:00 sa gabii maoy mipahibalo nila nga giirog ang takna sa ilang Hunyo 8, 2024 nga kasal. Gikan sa 8:00a.m. ngadto sa 9:30a.m.

Ug posible, maka-adjust unta ang pari sa iyang negatibong emosiyon ug malikayan unta ang salawayon niyang gibuhat sulod sa Katolikong simbahan nga bisag unsaon pa pagtabon sa iyang mga dumadapig, kinsa mipasiatab nga siya usa ka buotang pari, dili na kini makapahibalik sa kristal niyang imahe, diin siya ra mismo maoy nagbasag.

Ang bride mikompisal sa social media, nga pagpaso niya, hapit siya natakilpo.

Kay bisag anaa pa siya sa pultahan, ang misa gisugdan na sa nasukong pari. Buntis ra ba siya, diin inay dili ipanabi sa mga alagad sa simbahan, giingnan hinuon, nga abi nilag nanganak na siya sa ospital.

Hinuon, pinaagi sa usa ka open letter, misaysay sab sa publiko sa ilang habig ang simbahan ug nangayog pasaylo ang pari sa wala kapugngi nilang tawhanong kahuyang nga nakapasakit sa kaslonon ug mga kabanayan niini.

Mahimo kaayong mapasaylo nila si Father. Pero sa panid sa ilang marriage story, mahiapil gayod ang balaang imahe sa pari nga nabati.  Ug kinsa bay makalimot   niini?