Paalam sa Finals

MANILA, Philippines — Naitarak ni Carlo Paalam ang unanimous decision win kay Muhamad Fuad Redzuan ng Malaysia upang umusad sa finals ng men’s light flyweight division sa 2019 Southeast Asian Games boxing competitions sa PICC Forum sa Pasay City.

Maagang naglunsad ng matatalim na atake si Paalam nang pakawalan nito ang solid straight upang patumbahin si Redzuan na binigyan ng stan­ding eight-count.

Nakarekober ang Malaysian pug at naipagpatuloy ang laban.

Sa huli, iginawad kay Paalam ang 30-27, 30-27, 30-27, 30-27, 30-26 panalo para tumiyak ng puwesto sa finals.

Makakasama ni Paalam sa finals sina world champion Nesthy Petecio (women’s featherweight) at Marjon Pianar (men’s middleweight) na awtomatikong umusad sa gold-medal match sa kani-kanilang dibisyon base sa inilabas na draw.

Hindi naman pinalad sina Aira Villegas at Ian Clark Bautista na parehong lumasap ng kabiguan sa kanilang semis bouts para magkasya na lamang sa tansong medalya.

Yumuko si Villegas kay Nilawan Techasuep ng Thailand sa women’s bantamweight division.

Nakakuha ang Thai bet ng 30-27, 29-28 at 29-28 desisyon mula sa tatlong hurado habang binigyan si Villegas ng 29-28 at 29-28 ng dalawang judges.

Ganito rin ang kinasadlakan ni Bautista na natalo kay defending SEA Games gold medalist Chatchai-Decha Butdee ng Thailand via unanimous decision sa men’s bantamweight class.

Lahat ng hurado pumabor sa Thai fighter – 30-27, 30-27, 30-27, 30-27 at 29-28.