PSN Palaro

3 pinoy cue masters nagmartsa sa last 16

Chris Co - Pilipino Star Ngayon

November 2, 2017 | 4:00pm

MANILA, Philippines — Tatlong Pinoy cue masters ang umusad sa Last 16 ng prestihiyosong 2017 World Pool Series - Grand Finale na ginaganap sa Steinway Billiards sa Astoria, New York City sa USA.

Nangunguna sa pagmartsa si 2004 World 9-Ball titlist Alex Pagulayan na nagtala ng 9-8 panalo laban kay Justin Bergman ng Amerika upang manatiling walang bahid ang kanyang rekord sa tatlong laro.

Pasok din sa susunod na yugto sina Dennis Orcollo at Jeffrey De Luna na kinailangan pang dumaan sa losers’ bracket bago makahirit ng tiket sa Last 16 ng torneong may basbas ng World Pool-Billiard Association.

Yumuko ang two-time world champion na si Orcollo kay Petri Makkonen ng Ireland sa third round (9-6) subalit nakabalik ito sa porma matapos itarak ang 9-1 panalo laban kay Zion Zvi ng Israel sa kanilang do-or-die game.

Ganito rin ang kinasapitan ni De Luna na lumasap muna ng 5-9 kabiguan kay Shaun Wilkie ng Amerika sa third round bago nakabawi nang patalsikin nito si Lee Vann Corteza sa kanilang rubber match (9-7).

Magtatagpo sa Last 16 sina Pagulayan at Orcollo samantalang titipanin ni De Luna si Alex Kazakis ng Greece sa $65,000 event na may nakalaang $14,000 sa magkakampeon at $7,500 sa runner-up.

Maliban kay Corteza, namaalam na rin sa kontensiyon sina Johann Chua, Ronnie Alcano, Carlo Biado, Warren Kiamco, Roberto Gomez at James Zoren Aranas na natalo sa kani-kanilang do-or-die games.

Tumupi si Chua kay Chris Melling ng Great Britain (3-9), iginupo si Alcano ni Jayson Shaw ng Scotland (8-9), natalo si Kiamco kay Damianos Giallourakis ng Greece (5-9), hindi pinalad si Aranas kay Kai Lun Hsu ng Chinese-Taipei (4-9), bigo si Gomez kay Imran Majid ng Great Britain (3-9) at hindi umubra si Biado kay Zvi (5-9).

Apat na Chinese-Taipei bets ang umusad sa Last 16 - sina Ko Pin Yi, Chang Jung Lin, Chang Yu Lung at Wu Kun Lin.

Ang iba pang nagkwalipika sa susunod na yugto ay sina Wilkie, Shaw, Makkonen, Melling, Giallourakis, American Frankie Hernandez, Ruslan Chinakov ng Russia at Klenti Kaci ng Albania.