Puwesto sa Ronda Pilipinas pakay ng Pagnanawon siblings
MANILA, Philippines – Papagitna ang tatlong anak ni dating Tour champion Rolando Pagnanawon sa hanay ng mga umaasang makakasama sa LBC Ronda Pilipinas 2017 edition sa pagpadyak ng ikalawa at huling qualifying races sa Bacolod City, Negros Occidental.
Babanderahan ni Jaybop Pagnanawon, anak ng nagkampeon sa Marlboro Tour noong 1986, ang kanyang dalawang kapatid na sina Jhundie at Jetley para sa hangaring makabilang sa 30-man qualifier na isasama sa 90 sa main race ng LBC Ronda Pilipinas na nakatakda sa Pebrero 4 hanggang Marso 4 ng 2017.
Magbabalik ang 27-anyos na si Pagnanawon, kakatawan sa Team Pagay Construction, matapos mabigong makasama sa listahan noong nakaraang taon.
Si Pagnanawon ang nanguna sa una sa two-stage Visayas qualifier noong 2015 matapos ungusan sina dating Ronda winner Irish Valenzuela at Balir Ravina.
Subalit nagkaroon siya ng mechanical problems sa final stage na naghulog sa kanya para sa main race.
Umaasa si Pagnanawon at kanyang dalawang kapatid na makakasama sa main race ng pinakamalaking cycling race na naglalatag ng premyong P1 milyon mula sa presentor na LBC at mga major sponsors na Mitsubishi, Petron, ASG Group, Dans360 at Donen at may basbas ng PhlCycling sa ilalim ng presidente nitong si Abraham ‘Bambol’ Tolentino.
Hangad naman ni Go for Gold bet George Luis Oconer, nanguna sa unang qualifying race sa Subic Bay noong Nobyembre, na mawalis ang qualifying patungo sa main race ng annual race.
- Latest
