Mungkahi ni ‘Tol’ okay, pero...
Tumpak sana ang mungkahi ni Sen. Francis Tolentino na magkaroon ng maluwag na eksplorasyon sa likas na yaman ng West Philippine Sea. Sa ganito, gagaan ang kabuhayan ng bansa. Tiyak na bababa ang halaga ng bilihin, lalo na ang mga lamandagat at pati elektrisidad ay bababa ang rate.
Ngunit sa panahong ginigipit tayo ng China sa pamamagitan ng pambubuli maging sa mga sarili nating patrol vessels, paanong magagawa iyan? Iyan nga ang dahilan kung bakit pilit na inaangkin ng China ang ating teritoryo na batid nitong sagana sa mga mahalagang mineral at likas na kayamanan. Kaya ultimo maliliit nating mangingisda ay pinipigilang pumalaot sa karagatan.
May problemang pangkabuhayan din ang China at gagawin nito ang lahat “by hook or by crook” para isalba ang naghihingalo nitong ekonomiya at mapanatili ang status bilang world economic power.
Nakikita naman ng buong mundo na pati ang dating probinsiya nitong Taiwan na mahigit 70 taon nang nagsasariling bansa ay pinaplano nitong maibalik bilang bahagi ng nasabing bansa. Palibhasa’y isa nang produktibong bansa ang Taiwan at malaki ang maitutulong nito kapag nakuhang muli ng China.
Tama ang tinuran ni Tolentino na himukin ang mga investors na mamuhunan sa exploration ng WPS dahil kung gobyerno ang papasan ng gastusin, hindi natin ito makakayanan. Kaya ang payo ng Senador ay luwagan o gawing less restrictive ang mga patakaran ng pamahalaan sa eksplorasyon ng naturang territorial waters natin. Ang tanong na lang ay sa papaanong paraan gayung nakaharang ang China?
Marahil kung isasama ang China sa joint exploration ay matutupad ang layunin ni Tolentino pero mukhang suntok sa buwan ito.
- Latest
