^

PSN Opinyon

Social media sinisisi sa human trafficking

PINOY OVERSEAS - Ramon M. Bernardo - Pilipino Star Ngayon

Isa sa mga problemang maaaring ibunga ng paghahanap ng trabaho sa ibang bansa  sa pamamagitan ng social media ang kawalan dito ng katiyakan na legal ang inaaplayan ng mga aplikante at ligtas itong makakapagtrabaho roon. Hindi normal na proseso na sa social media lang nakikipag-usap ang job applicant sa recruiter. Bakit nga naman kasi sa Facebook at ibang social media dumadaan? Bakit hindi sa tama at lisensiyadong recruitment agency na kinikilala ng pamahalaan?  Bakit hindi papuntahin ang aplikante sa opisina ng recruiter kung talagang lehitimo ito? At kung call center agent ang inaaplayan, bakit kailangang pumunta sa ibang bansa gayong puwede naman gawin ang trabaho kahit sa Pilipinas  sa tulong ng teknolohiya?

Kamakailan lamang, nagbabala ang Department of Migrant Workers sa publiko laban sa mga recruiter na nangangako ng trabaho sa mga nais maging overseas Filipino worker sa Thailand, Cambodia, Myanmar at Laos sa pamamagitan ng social media.

Sinabi ng DMW sa pamamagitan ng Philippine Overseas Employment Administration na daan-daan nang biktima ng illegal recruitment at trafficking in persons ang sumangguni sa mga embahada ng Pilipinas para makauwi galing sa Golden Triangle dahil sa reklamo ng mahabang trabaho at pagmamaltrato ng mga Chinese mafia na pinipilit silang magtrabaho bilang mga scammer ng cryptocurrency trading. Napaulat na kadalasang mga biktima ng ganitong scam ang mga  residente sa United States at United Kingdom.

Nagbabala ang DMW sa mga Pilipino na huwag makipag-usap sa sino mang indibidwal na nangangako ng trabaho bilang customer service representatives o call center agent sa ilang mga bansa tulad ng nabangit sa una. Idiniin ng ahensiya na marami na ang nabiktima sa ganitong modus na nagsisimula sa simpleng private message (PM) sa social media.

“Maging matalino at huwag magpaloko sa mga scam na nag-aalok ng trabaho bilang call center agent sa Thailand, Cambodia, Myanmar o Laos. Marami nang naging biktima ang modus na ito at napunta sa mga illegal na POGO sa mga bansang nabanggit,” babala pa ng DMW.

Naunang napaulat na, mula noong Setyembre 2022, ang DMW ay nakapagligtas ng mga biktima ng human trafficking sa Thailand – 1,843 katao; Cambodia – 204; Vietnam 337; Laos- 17; Myanmar- 2;  at Singapore- 845.

  Sa isang pagdinig sa Senado nitong nagdaang linggo, sinabi ni DMW Undersecretary Bernard Olalia na lumubha ang problema ng bansa sa human trafficking dahil ginagamit na ngayon ng mga recruiter ang social media para makapambiktima.  

“Tinitingnan po natin ang mga online post sa FB, sa Instagram, sa TikTok. Marami po kasi d'yan, Madami. Kami po ay may surveillance team tulad ng nabanggit ko kanina,” sabi pa niya. “Kaya kami po ay nakikipag-ugnayan sa Meta Philippines para sa FB at nagre-request po kami ng takedowns. At marami na po kaming napa-takedown na post… Yun pong ating MOUs sa LGUs natin, kasi kailangan din pong malaman ng mga PESO managers para mai-disseminate sa mga grassroots, sa OFW sector.”

Sa nabanggit na pagdinig sa Senado, humarap dito ang ilang nabiktimang overseas Filipino worker na ipinakilala sa mga alyas na Miles, Ron at Brando. Nag-aplay silang call center agents sa Cambodia. Pinangakuan sila ng recruiter ng buwanang sahod na $800. Dumaan sa Ninoy Aquino International Airport patungong Cambodia sina Miles at Ron habang si Brandon ay sa Mindanao dumaan palabas ng Pilipinas.

"Pinakilala ako ng aking kababata sa isang Malaysian na nagpakilalang Meilin na nasa Cambodia, na kinausap ko via Telegram. In-interview ako ni Meilin via Telegram video call… Pina-process na sa akin ni Meilin ang POEA and OWWA na mga pre-departure documents. Pinadalhan ako ni Meilin ng pera para ayusin yung mga papeles na ito,” sabi ni Ron sa pagdinig ng Senate Committee on Women, Children, Family Relations, and Gender Equality.

“Mabilis lamang ang proseso ng pagpapadala ng mga recruit sa Cambodia dahil may connection sa Bureau of Immigration, sa Clark International Airport,” sabi naman ni Miles.

  Nasa Cambodia na sila nang matuklasan nilang magtatrabaho sila bilang mga scammer. Sinabi nina Miles at Ron na nakita nila kung paanong ang ilang empleyado ay kinukuryente bilang parusa.

“Ayoko sana pirmahan ang kontrata. Pero… babayaran ko daw lahat ng expenses sa akin na total na $1,700 at babayaran ko din ang pamasahe pauwi. Dahil wala akong pambayad, napilitan akong pumirma,” sabi pa ni Ron said.

Ayon kay Miles, “Kailangan namin mag-post ng iba’t ibang openings sa POGO Jobs Facebook groups. Kapag hindi namin sinunod, may penalty. US$100-300 ang penalty kapag hindi ka nakapag-recruit ng tao. Kapag hindi ka nag-post, US$20-50. Kaya dapat may screenshots ka showing na nag-post ka. Target recruit is 3 to 5 Filipinos per month.”

Ibinunyag din ni Ron na lahat ng nakalagay na job offer sa Facebook na customer support o call center sa Cambodia ay scam. “Papalabasin ka na call center, chat support. Pagdating doon, gagawin kang scammer,” pahayag pa ni Ron.   Lumitaw din sa pagdinig na peke ang Immigration stamp sa kanyang passport.

Nakakalungkot at nakakadismaya na patuloy na may ganitong mga pangyayari sa kabila ng marami nang naunang babala ng mga kinauukulan laban sa illegal recruitment at human trafficking.  Hindi naman masisisi at hindi madaling mapigilan  ang marami nating kababayan na sumubok makipagsapalaran sa ibang bansa kahit mahaba na ang listahan ng mga kaso ng illegal recruitment at human trafficking. Hindi ito nakakatinag sa kanila. Pero sana ay maging maingat sila, mapagmatyag, magsaliksik, magtanong,  tiyaking dumadaan sa legal na proseso para hindi mapahamak sa hangaring maghanap ng magandang kapalaran sa ibayong-dagat.

* * * * * * * * * *

 Email [email protected]   

vuukle comment

HUMAN TRAFFICKING

Philstar
x
  • Latest
Latest
Latest
abtest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with