Duterte mainit kontra katiwalian; appointees niya tila malamya (1)

Radikal ani Pangulong Duterte ang solusyon niya sa katiwalian. Kailangan daw nito ang bagong batas. Sasali siya mismo sa hearings ng Kongreso.

Nagpapakitang ganado kontra korapsiyon si Duterte. Pero tila hindi interesado ang mga appointees niya. Kontra-pelo sila sa kanya.

Ehemplo ang pagkontrata sa kumpanyang kapos sa kapital para sa P107-bilyong expansion ng Manila International Airport. Pinaspasan ito nang tatlong linggo nu’ng Hulyo, bunyag ni Rep. Jericho Nograles. Naka-skeletal force noon karamihan ng mga ahensiya dahil sa pagdami ng COVID-19 infections. Pinanagot ni Nograles ang mga transport at MIA officials. Sa kawalan ng transparency, linabag ang Build-Operate-Transfer at ang Procurement Reform Acts. Binigyan ang kontratista ng mga pribilehiyo na ipinagkait sa karibal kaya umatras ang huli.

Alam ng transport appointees kung saan nauuwi ang kakapusan ng kapital. Nu’ng 2012 ang kumpanyang P625,000 lang ang hawak ay binigyan ng P56 milyon kada buwan para imentena ang MRT-3. Ibinulsa nito ang bayad pero iniwang sira-sira ang mga tren, riles, signaling, power supply, at mga istasyon. Nu’ng 2013 isa pang fly-by-night na dating nasentensiyahan sa panloloko ay binigyan ng P3.8 bilyong paggawa ng vehicle registration plates. Ang dineliber, huli at kulang-kulang, ay mga bakal na plates na nalulukot sa tubig baha. Binulgar dito sa Sapol ang pagtatakip sa shortcuts sa dalawang naturang kontrata.

Hindi sinisilip ng Energy Regulatory Board ang isa pang binulgar ni Nograles. Ito ang walang permisong paniningil ng pribadong grupo ng P2 bilyon kada taon ng government fees mula sa electricity wholesale market. Mga kamag-anak ng Duterte appointees ang nakikinabang sa kapos-kapital na grupo. Presidential appointees din ang mga nasa-ERB. Sana hindi sila nagtatakipan. (Itutuloy bukas)

* * *

Makinig sa Sapol, Sabado, 8-10 ng umaga, DWIZ (882-AM).