_ngayon
^

Ang buwan

PILANTIK - Dadong Matinik (Pilipino Star Ngayon) - January 14, 2018 - 12:00am

Ikaw at ang buwan sa aki’y iisa

ang mukha mo’y buwang aking sinisinta;

nang minsang magtago sa ulap ang ganda

pusong nagmamahal biglang nangulila!

 

Nang ang liwanag mo ay muling magningning

diwa ko’y naghangad na kita’y akyatin;

mataas na langit nais kong marating

upang kahit sinag ay aking maangkin!

 

At nang ang mukha mo’y nag-iba ng anyo

parang bangkang pilas na kakapiraso;

lalo kong hinangad tayo’y magkasuyo’t

tayo’y magkaangkas -- b’yaheng paraiso!

 

Kung araw ang buwan ay hindi matanaw

pagka’t nagtatago sa init ng araw

pag ito’y lumantad kung gabing mapanglaw

masaya ang gabi -- maganda ang buhay!

 

Napagod ang puso at ako’y naidlip

liwanag ng buwan sa dampa’y sumilip,

ikaw pala mutya’y di na panaginip

pagka’t tayong dalawa’y nasa isang banig!

Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with