P20.4 milyong shabu nasabat sa NAIA, consignee timbog
MANILA, Philippines — Umiskor ang mga awtoridad matapos na makasabat ng may P20.4 milyong halaga ng shabu at masakote ang consignee ng shipment ng illegal na droga sa ikinasang operasyon sa Ninoy Aquino International Airport (NAIA) kamakalawa ng hapon.
Kinilala ni Philippine National Police Drug Enforcement Group (PDEG) chief P/Brig. Gen. Dionisio Bartolome Jr., ang suspect na si Mohammad Bagatao alyas “Joseph Manasseh Acogido”, 51-anyos, na nahaharap sa kasong paglabag sa Article II ng RA 9165 o Comprehensive Dangerous Drugs Act of 2002.
Ayon kay Bartolome ang suspect ay nasakote sa interdiction operation na isinagawa ng Bureau of Customs at NAIA Inter-Agency Drug Interdiction Task Group (IADITG) sa Central Mail Exchange Center (CMEC) sa Domestic Road, Pasay City bandang alas-5 ng hapon.
Lingid sa kaalaman ng suspect ay tinututukan ng mga awtoridad ang namonitor na bulto ng shabu sa nasabing parcel para arestuhin ang consignee nito.
Hindi na nakapalag ang suspect matapos dakmain ng mga operatiba habang kini-claim nito ang parcel na naglalaman ng P20.4 milyong halaga ng shabu.
Ang nasabing parcel ay padala ng isang alyas “Juan Angel” mula Vancouver Canada, na naka-consignee naman kay alyas Joseph Acogino ng Quezon City.
Nakumpiska mula sa suspect ang tatlong self-sealing transparent plastic pouch na may marking pa na naglalaman ng 3,000 gramo o 3-kilo ng shabu at tatlong magkakaibang IDs.
Itinurnover na ang mga operatiba ang suspect at ang nakumpiskang ebidensya mula dito sa tanggapan ng Philippine Drug Enforcement Agency (PDEA) para sa kaukulang dokumentasyon at disposisyon.
- Latest
